Акафист святой великомученице Ирине

МолитвослоВ

Кондак 1

Избранной Богом от идолослужительнаго рода на просвещение языков, богомудрей и преславней невесте Христовой Ирине, благодарственное и хвалебное пение воспоем ти молитвенницы твои, святая и многострадальная великомученице Ирино. Ты же, имущи дерзновение ко Господу, от всяких нас бед и скорбей свободи, да зовем ти: Радуйся, Ирино, невесто Христова преславная.

Икос 1

Ангельскую честную и вселюбезную чистоту, святая мученице Ирино, непорочно сохранила еси, со Ангелы купно сподобилася еси Богу Трисвятую песнь воспевати на небеси, услыши нас, тебе верно поющих на земли:

Радуйся, отроковице, Богом Отцем предуставленная быти сообразна в страдании образу Сына Его.

Радуйся, Сыном Божиим из тьмы в благодатный свет призванная.

Радуйся, яко приявши Духа Святаго в отрочестве идолослужение отринула еси.

Радуйся, яко земнаго обручника паче Небеснаго знати не восхотела еси.

Радуйся, убелившая ризы твоя в крови Агнчей на земли.

Радуйся, яко в небеснем чертозе со Христом царствуеши на небеси.

Радуйся, Ирино, невесто Христова преславная.

 

Кондак 2

Видяще святая мученица Ирина себе на величественнем столпе от отца поставлену, помышляше себе, о Промысле Божием разумевая, о творчестем создании небеси и земли и бездушных идолех, умне восходяще от тьмы ко свету, от идолослужения к истинному Богу, Емуже вернии воспевают: Аллилуиа.

 

Икос 2

Божия Премудрости вместилищем была еси, непорочная отроковице: измлада бо любве к миру и вся, яже в мире, отвергшися, всею душею твоею Христа Жениха возлюбила еси, Емуже равноапостольно послужила еси среди неверных, проповедуя им истиннаго Бога. Сего ради таковому твоему разуму дивяся, глаголем:

Радуйся, премудрая евангельская дево, правыя веры и дел благих исполненная.

Радуйся, паче мудрецов мира сего разумнейшая.

Радуйся, в проповедании веры благоглаголивыя уста апостольския имущая.

Радуйся, христианских дев украшение.

Радуйся, оружием Креста Христова демоны отгоняющая.

Радуйся, верная ко Господу о нашем спасении молитвеннице.

Радуйся, Ирино, невесто Христова преславная.

 

Кондак 3

Сила Божия дадеся тебе, святая великомученице Ирино, во святем Крещении, егда пресвитер Тимофей, просветив тя, даде тебе Послание святых Апостолов, сим призывая тя на великое апостольское служение. Ты же, исполнившися Духа Премудрости, пред лицем отца твоего Ликиния, вся златыя идолы безбоязненно сокрушила еси и, яко раба Господня, едину Православную веру в Бога Отца и Сына и Святаго Духа исповедала еси, зовуще Ему: Аллилуиа.

 

Икос 3

Имущи, святая Ирино, свыше данную тебе премудрость и силу, егда многажды понукаема от Ликиния, отца твоего, поклонитися идолом, именуя тя Пенелопиею, рекла еси ему: «Не извращай моего имене, Ирина аз есмь, нареченная Ангелом в видении, и тако наименовася во святем Крещении. Не поклонюся бесам, имже вы покланяетеся, аз Единому Богу, Создателю моему, покланяюся и яко Жениха моего люблю». За таковое убо дерзновение приими от нас похвалу сию:

Радуйся, столпе веры и утверждение жития христианскаго.

Радуйся, детище, Богом просвещенное во святем Крещении.

Радуйся, вестнице Царя Небеснаго, Богом дарованная на просвещение языков.

Радуйся, в стране царствования отца твоего идольскаго служения искоренительнице.

Радуйся, яко подвиг твой многострадальный предвозвестиша голубь, кокош и вран, принесшии ти маслину, венец и змия.

Радуйся, яко предрече тебе Апелиан учитель: маслина — твое добронравие, венец — венец славы, а змий— враг, гласит страдания.

Радуйся, Ирино, невесто Христова, преславная.

 

Кондак 4

Бури тяжких искушений воздвиже на тя враг спасения, егда отец твой повеле тя поврещи свирепым коням на глумление и удов раздробление. Егда же ты помолилася еси — свирепейший конь, отрешившися, оторваше Ликинию руку и топташе его; ты же невредима пребывши, воскресила еси отца своего во имя Христа Сына Божия; он же со множеством народа уверовавше, восхвали Бога песнию: Аллилуиа.

 

Икос 4

Слышав от тебе злочестивый царь Седекия словеса разумна о вере Христовой, распаляшася на тя злобою; паче же егда рекла ему: «Не сяду с сонмом суетным и с законопреступниками не вниду. Готова аз на всякия муки и не пощажду плоти моея за Христа, Господа моего», — вверже тя в глубину рва, идеже гады ядовиты; ты же тамо пребыла еси десять дний невредимо со Ангелом, хранящим тя. Видящи же вси сия тобою чудодеемая, взываху:

Радуйся, младая страстотерпице, за мужественное исповедание веры много пострадавшая.

Радуйся, агнице кроткая, идольския суетныя лести обличительнице.

Радуйся, яко тобою посрамися лукавый враг, видя себе побежденным.

Радуйся, о тебе бо радуются вся Небесныя Силы, видя тя побеждающу лютых мучителей.

Радуйся, подвиги твоими многи богохульныя правители к Богу приведшая.

Радуйся, многострадальная дщи немилостиваго царя Ликиния.

Радуйся, Ирино, невесто Христова преславная.

 

Кондак 5

Богосветлой звезде подобна была еси, великомученице Ирино, множество племен и языков ко спасению приведшая: три идолоязыческия страны просветила еси, тяжкия страдания от мучителей Седекия и Саваха претерпела еси, трижды железною пилою перепиливаема и на колесе раздробляема была еси. О великомученице! Твоих страданий небесныя стихии, гром и молния, не стерпеша и нечестивыя поразиша; людие же, увероваше, со трепетом Бога прославляху, поя Ему: Аллилуиа.

 

Икос 5

Видевше царь Савах, яко сила Божия, в тебе чудодействуемая, поборает и посрамляет его безумныя веления, ополчи сто тысящь воинов на Магеддон град;ты же, пребывающи ту, молилася еси Господу о поражении слепотою грядущих нань и, по ослеплении их, паки умолила еси Всевышняго даровати им прозрение. О сих радости исполняеми, глаголем тебе сице:

Радуйся, святая Ирино, тобою бо свет Христов возсия в странах языческих.

Радуйся, богопротивных царей и воинов дивное вразумление.

Радуйся, града Магеддона преславное защищение.

Радуйся, веры Православныя исповедание и света Евангельскаго сияние.

Радуйся, закона Божия верная хранительнице.

Радуйся, многострадальная дево, от лютаго Седекия многажды палимая.

Радуйся, Ирино, невесто Христова преславная.

 

Кондак 6

Проповедником Богоносным Апостолом поревновала еси, егда пред мучителmми безбоязненно Христа Бога проповедовала еси, Егоже ради тяжкия раны, узы и темницу претерпела еси, во огни в медных пещех палима была еси: обаче сохрани тя Ангел Господень во славу Божию; темже и мы взываем Богу Всемогущему: Аллилуиа.

 

Икос 6

Возсиял есть в сердце твоем свет богоразумия Господа Иисуса Христа: Той бо, яко Жених твой возлюбленный, укрепляше тя, сопричастницу Его страданий, егда вонзоша тебе в пяты острыя гвоздия и, обуздавши яко осля, пять поприщ насильно ведоша тя; ты же в страшнем страдании своем моляся Богу, тысящи народа просветила еси, беззаконных же мучителей разверзшаяся земля поглотила есть; мы же вопием ти:

Радуйся, Ирино, рабо Господня и молитвеннице наша.

Радуйся, голубице кроткая, язвы Господа на себе носившая.

Радуйся, от ран гвоздинных, кровию истекающих, Ангелом исцеленная.

Радуйся, яко дарова тебе Господь силу и мудрость побеждати противостоящих истине.

Радуйся, яко тобою от многих ран и болезней кающиися исцеляются.

Радуйся, яко твоею молитвою бесы прогоняются и прокаженнии очищаются.

Радуйся, Ирино, невесто Христова преславная.

 

Кондак 7

Восхотев безумный мучитель тя, святая Ирино, ко идолослужению преклонити, увещева тя пожрети идолом жертву, ты же, Крестом оградившися, воскликнула еси: «Аз приношу жертву Богу Всевышнему, Иже обладает жизнию и смертию всех людей. Вразумися же, царю, прельщенный сатаною!» Освирепевший же мучитель, скрежеща зубами, повеле в медных пещех трикраты палити тя: Ангел же Господень, пламень остудив, сохрани тя невредиму во славу Бога, Емуже поем: Аллилуиа.

 

Икос 7

Новую показа ярость безчеловечия злобный Вавадон, егда повеле на тя, святая мученице Ирино, узами железными привязану к раскаленному железу, возливати масло и смолу. Ты же, Божия страдалице, в пламени горящем пребывающи со Ангелом, отрешившим от железнаго одра и охлаждающим тя, Бога славила еси. Таковому чуду мучитель зело изумися и к стопам твоим паде, прощения прося и святых молитв за всю страну, ко Господу обратившуюся. Мы же с любовию взываем к тебе:

Радуйся, многострадальная мученице, за Христову Церковь много претерпевшая.

Радуйся, святая девице, Христа ради в пещех и во огни палимая.

Радуйся, за спасение людей на железном одре жегомая.

Радуйся, великая страстотерпице, Христа ради тяжко мучимая.

Радуйся, яко твоими страданиями мног народ к познанию Бога истиннаго привела еси.

Радуйся, врагов Церкви победительнице и в бедах наших скорая помощнице.

Радуйся, Ирино, невесто Христова преславная.

 

Кондак 8

Странныя и страшныя страдания святыя мученицы видевше, вернии удивишася, како младая отроковица, суще в юном телеси, мужественно за Христа муки претерпевает, да и мы исполншеся умиления, благодарно возопиим Богу: Аллилуиа.

 

Икос 8

Весь Сладчайший Иисус сладость тебе бысть, мученице Ирино, за Негоже горькия муки и тяжкия истязания от седми мучителей претерпела еси, и яко агница от нечестиваго Савария мечем усечена и погребена была еси, последи же из мертвых востала еси с райскою ветвию в руках, и в Месемврии к царю явилася еси богохульникам на вразумление и посрамление. Со страхом к твоим ногам паде царь, взывая: «Велик Бог христианский!» Просвети и нас, святая Ирино, да зовем ти:

Радуйся, святая равноапостольная Ирино, просветительнице стран языческих.

Радуйся, реко, исполненая благодати Божия.

Радуйся, боговозлюбленная ластовице, из небожителей воззванная на спасение богохульных и отверженных.

Радуйся, преславная мученице, многия богопротивныя просветившая.

Радуйся, яко силою Божиею демонстии коварства упразднила еси.

Радуйся, блаженная страстотерпице, райскую ветвь от Христа приимшая.

Радуйся, Ирино, невесто Христова преславная.

 

Кондак 9

Вся Небесныя Силы возрадовашася, восхваляя Бога, даровавшаго тебе таковое мужество и непоколебимую твердость во брани душепагубных аспидов побеждати: ты бо, силою Божиею укрепляема, языки многия просвещая, радовалася еси, воспевая Богу: Аллилуиа.

 

Икос 9

Ветии многовещании риторскими своими языки не возмогут изрещи твоих болезненных страданий и мученических подвигов, яже за Христа претерпела еси: кто бо может исчести твоя безчисленныя страдания, имже мы удивляющися, поем ти:

Радуйся, чудодейственное зрелище Ангелом и человеком.

Радуйся, яко твоим терпением мучителей удивила еси.

Радуйся, яко кровь свою за Христа Жениха твоего источила еси.

Радуйся, мучеников похвало и верных радование.

Радуйся, лозо плодоносная сада Иисусова.

Радуйся, доброплодная ветвь винограда Христова.

Радуйся, Ирино, невесто Христова преславная.

 

Кондак 10

Спасти восхотевши души, во тьме идолослужения погибающия, и ревнуя о Господе, якоже Илия, силою Божиею идолы сокрушала еси, боголюбивая мученице Ирино, бесы прогоняющи, мучителей обличающи и посрамляющи. Богу же победную песнь непрестанно воспевала еси: Аллилуиа.

 

Икос 10

Стена крепкая и непоколебимая во исповедании Православныя веры пребыла еси: сладкоцветущия юности твоея не пощадила еси, и вся царская достояния отца твого презрела еси, обаче чрез мученическую смерть уневеститися Христу и с Ним быти в Ангельстем ликостоянии возжелала еси. Мы же, поминающе твоя подвиги и страдания, ублажаем тя сице:

Радуйся, течение мученическаго пути добре скончавшая.

Радуйся, равноапостольным житием твоим Господеви послужившая.

Радуйся, силою свыше на брань с сопротивными препоясанная.

Радуйся, верным христианом крепкое заступление.

Радуйся, безпомощным заступнице и сирот покровительнице.

Радуйся, мучеников радование и девственников славо.

Радуйся, Ирино, невесто Христова преславная.

 

Кондак 11

Пение хвалебное воспевати по достоянию недоумевает ум наш, святая мученице Ирино, ты бо распятому Агнцу — Христу подражающи, душу свою за други своя положила еси: больше бо сия любве никтоже имать. Обаче вси мы, благодарни суще, поем Богу: Аллилуиа.

 

Икос 11

Светозарный светильник истиннаго света сущим на земли являешися, богоизбранная мученице: просвещаеши бо сердца верных, исцеляеши недужных и прокаженных, притекающих к тебе с любовию, разслабленным и слепорожденным здравие подаеши, благодарящим тя тако:

Радуйся, о спасении грешных усердная ходатаице.

Радуйся, обидимых заступнице, злочестивых поборающая.

Радуйся, сосуде благ небесных.

Радуйся, златая кадильнице, фимиам молитвы о нас Богу приносящая.

Радуйся, сокровище даров Божиих неиждиваемое.

Радуйся, яко тебе Господь Царство Свое даровал есть.

Радуйся, Ирино, невесто Христова преславная.

 

Кондак 12

Благодать тебе дана есть, якоже Апостолом, слово Божие грешному миру вещати, омраченныя от идолослужения отвращати и всем в подвизех земных помогати. О достославная рабо Господня, много потрудившаяся за род христианский, молися за ны ко Всемилостивому Богу, Спасителю нашему, да сподобит и нас в сем и в будущем веце Бога в Троице прославляти, воспевая Ему: Аллилуиа.

 

Икос 12

Воспеваем твоя славныя подвиги, почитаем страдания, хвалим долготерпение, ублажаем святую твою кончину, славим твое в немощнем телеси непобедимое мужество, имже попрала еси вся мудрования мира сего. Ты же в память подвигов и страданий твоих приими от нас хвалебное пение сие:

Радуйся, от девственных ликов в чертог небесный введенная.

Радуйся, от мученических полков во гласе радования провождаемая.

Радуйся, от небожителей досточудное о Господе приимшая целование.

Радуйся, яко мзда твоя — радость вечная во светлости святых.

Радуйся, яко тобою от нечаянныя смерти сохранитися уповаем.

Радуйся, яко твоим заступлением Царствия Божия сподобитися чаем.

Радуйся, Ирино, невесто Христова преславная.

 

Кондак 13

О преславная и всехвальная святая великомученице Ирино! Приими от нас малое хвалебное пение сие и не престани молитися за ны ко Господу Богу, да избавит нас от враг видимых и невидимых и твоим заступлением сподобит нас вечнаго Царствия, идеже вкупе с тобою и всеми святыми воспоем Ему: Аллилуиа.

 

(Этот кондак читается трижды, затем икос 1 и кондак 1)

FavoriteLoadingВыбрать